Apa yang Jatuh Tra Boleh Diambil

Category: Cerita Mop dan Mob Papua

Ada
satu Tete dia datang kekota, tapi sudah lama dikota dia punya anak tra
mau ajak dia jalan-jalan padahal dia ingin sekali jalan-jalan ke kota,
satu hari dia protes,

"Pokoknya kalau kamu orang tra mau ajak sa jalan-jalan sa mau pulang kampung saja."

Begini dia punya cucu ajak dia jalan-jalan ke kota tapi dengan
perjanjian Tete tra boleh bikin malu dan kalo liat barang yang su jatuh
kita tra boleh ambil...


Tete setuju, trus dong dua jalan sampai di kota dia punya cucu liat uang 10.000,- jatuh dia korek dia punya Tete,

"Tete...ada uang 10.000,- jatuh tong ambil ka..."

Tete kasih ingat cucu... "Ko su lupa dengan tong dua pu perjanjian?"

Cucu bilang, "Iyo tete sa lupa berarti sekarang tong dua jalan sudah"

Tra lama tete yang gantian liat uang 100.000,- jatuh trus tete bilang sama dia pu cucu...

"Cucu... ada uang 100.000,- jatuh lumayan buat tambah-tambah jajan..."

Dia pu cucu larang tete, "Ko tra ingat perjanjian ka..."

Tete bilang, "Yo... tra papa sudah sekarang tong dua lanjut jalan..."

Tapi dalam perjalanan tete trus ingat itu uang 100.000,- sampai dia tra sadar dia masuk dalam got... lalu tete batariak...

"Cucu... ko tolong tete dulu tete ada jatuh di got... tempo ko tolong dulu..."

cucu balik muka dan bilang sama tete " TETE KO LUPA PERJANJIAN KA... APA YANG SU JATUH TRA BOLEH DIAMBIL TO....."

Tete bilang, "Dasar cucu kurang ajar..."