Depe Nama Nangka

Category: Bakusedu Manado

Ada
ini sopir mikro (angkot) jurusan Aermadidi-Kauditan orang Advent
(aliran agama Kristen yg melarang makan babi). Waktu ba muat penumpang
di hari pasar Aermadidi, ca' so bilang memang pa calon penumpang,
nimbole muat boke (babi) pa depe oto.

Datang ini oom bawa karong kong dia iko muat di oto. Tu sopir yang
curiga langsung batanya, "Apa di dalam karong, oom?" Itu oom langsung
manyao, "Nangka."

Lantaran oto langsung fol (penuh) waktu itu oom nae, jadi sopir langsung berangkat.

Oto so bajalan agak jao kong tu karong rupa ba bagerak. Sopir langsung
ba tengo ke belakang. "Oom! Ada bagerak tu karong tadi?". Oom bilang,
"Nyanda egh! Cuma sopir p perasaan itu."

Lanjut perjalanan. Pas sampe di Kaima ada jalan lobang kong oto ta tada
di jalan lobang. Tiba-tiba dapa dengar bunyi "Grrok.. Uikk.." dari arah
karong, kong jelas-jelas dapa lia itu karong balumpa. Sopir langsung
brenti kong ba marah pa oom.

Sopir: "Boke itu kang?"

Oom : "I-iyo..."

Sopir: "Tadi kwa bilang nangka!! Ba towo (dusta) oom ini egh!"

Oom : "Nyanda eh! Ini boke pe nama Nangka!"